கடைசி ஆசை

---------------------------------

உண்டியல் காசோடும்
அம்மா வளையல்களோடும்
பட்டனம் வந்தேன்
வியர்வை சிந்த.

சந்தேகத்தின் பெயரில்
சிறைப்பிடித்து
நாளை
தூக்கிலிடப் போகிறார்களாம்

என் தங்கைக்கு
கால்கொலுசும்
‘என்ர மவன்
பட்டனத்தில வேல பாக்கிறான்.
உன்ர கடன் எல்லாம்
அடுத்த மாசமே தாரேன்’ என்று
நம்பிக்கையுடன் உயிர் நீட்டும்
என் அம்மாவுக்கு
கம்மலும்
என் சட்டைப்பையில்
கொஞ்ச காசும் இருக்கு.
எப்படியாவது
என் தங்கையையும்
என் அம்மாவையும்
அநாதையில்லத்தில்
சேர்த்துவிடுங்கள்.
இதுவே என் கடைசியாசை.

---------------------------------